Kryeministri i Kosovës, Ramush Haradinaj në mbledhjen e sotme të Qeverisë mori vendim për shkarkimin e drejtorëve të Ndërmarrjeve Publike, të cilët kishin shkelur Ligjin për Ndërmarrje Publike.

Ky vendim është marrë pas shkresës që zyra e kryeministrit kishte pranuar nga Agjencia Kundër Korrupsion, ku kërkohej të merren masa ndaj personave që janë emëruar nëpër borde, në kundërshtim me dispozitat ligjore.

Por, shumica e këtyre drejtorëve dhe anëtarëve të bordeve kanë lidhje me partitë politike, raporton lajmi.net.

Naser Canolli i shkarkuar nga Bordi i Drejtorëve në Aeroportin e Gjakovës, është anëtar i Këshillit Drejtues të PDK-së, kurse ka qenë edhe nënkryetar i degës së PDK-së në Prishtinë.

Lidhje me politikën ka edhe Zenun Shala, gjithashtu i shkarkuar nga Haradinaj në Bordin e Drejtorëve të Aeroportit të Gjakovës.

Shala në vitin 2013 kishte kandiduar për kryetar të Junikut, nga radhët e Lidhjes Demokratike të Kosovës.

E afërt me LDK-në është edhe e shkarkuar tjetër nga bordi në Aeroportin e Gjakovës, Brikenda Kryeziu.

Kjo e fundit ka qenë deputete e partisë së Isa Mustafës gjatë viteve 2004-2007.

Nexhat Dedia i cili me vendimin e fundit të Haradinajt u shkarkua nga bordi i drejtorëve në Ndërmarrjen Infrakos, është asambleist i PDK-së në komunën e Mitrovicës.

Edhe Musa Misini, i cili deri sot ka qenë në bordin e drejtorëve të Ndërmarrjes KOSTT ka lidhje me LDK-në.

Prej viti 2002 deri në vitin 2013 Misini ka qenë kryetar i degës së LDK-së në Viti. Kurse në zgjedhjet e vitit 2014 ka qenë edhe kandidat për deputet.

Që nga ardhja në pozitën e kryeministrit, Ramush Haradinaj e ka shkarkuar edhe Komisionin për Matjen e Territorit, Drejtorin dhe Bordin e Agjencisë për Akreditim, dhe së fundi shkarkoi edhe drejtor dhe anëtarë të bordeve nëpër Ndërmarrje Publike.